Meeqqiorneq
Siunissami inunngortussanik naatsorsuinermi arnaq qanoq amerlatigisunik meerartaassanersoq aamma arnat meeqqiorsinnaasut inuiaqatigiit akornanni qanoq amerlatigissanersut taputartuullugit naatsorsorneqarput.
Ukiut tallimat ingerlanerini, tassa 2013-imiit 2017-imut ukioqqortussuseq apeqqutaatillugu innuttaasut akornanni qanoq meeqqiortoqartigisimanersoq naatsorsorneqarnikuuvoq. Qanoq amerlatigisunik meerartaartarneq tassaavoq arnat aalajangersimasumik ukiullit akornanni 1.000-iugaangata meeqqat inunngortut amerlassusaat. Qanoq amerlatigisunik meerartaartarneq tassaavoq naatsorsukkat tamarmik katinnerat, tassanilu pineqartarpoq arnap meerartaarsinnaanermini (15-init 49-nik ukiullit) qanoq amerlatigisunik meeqqiornissaa, tassa arnaq ukiuni meeqqiorfissamini meeqqiussaguni 50-inillu ukioqalernissami tungaanut inuussaguni.
Innuttaasut tamakkerlugit ukioqqortussutsit tallimat akornanni qanoq meeqqiortoqartigissanersoq titartagaq 4-imi takuneqarsinnaavoq. Tassani takuneqarsinnaavoq ukiut 15-it kingulliit ingerlaneranni meeqqiorneq apparsimasoq, tassani arnat inuusunnerit 25-t ataallugit ukiullit pisuujunerpaapput. Arnat 15-it 19-illu akornanni ukiullit meeqqiornerat appaqqaarsimavoq ukiullu qulit matuma siorna arnat 20-t 24-llu akornanni ukiullit meeqqiornerat apparsimalluni.
Titartagaq 4. Ukiut eqqarsaatigalugit meeqqiorneq, 1995-imiit 2017-imut innuttaasut tamakkerlugit
Najoqqutaq: Naatsorsueqqissaartarfik - Kisitsisaataasivimmi kisitsisit takukkit (http://bank.stat.gl/benft).
Meeqqiornerup qanoq appartiginissaa eqqoriarneqarsinnaanngilaq. Savalimmiuni, Islandimi aamma Kalaallit Nunaanni meeqqiorneq Nunani avannarlerni meeqqiornermut sanilliullugu qaffasinnerujussuuvoq, Nunani avannarlerni meeqqiorneq inunnik amerliartortitsiunnaareernikuuvoq.
Innuttaasut amerlassusissaannik naatsorsuinermi 2013-imiit 2017-imut arnat 1.000-it 2.062-inik meeqqiorsimasutut naatsorsorneqarput. Ilimagineqarpoq ukiuni qulini tulliuttuni meeqqiorneq annertusiallalaassasoq, tamatumalu kingorna innuttaasut amerlassusissaannik naatsorsuiffiusumi assigiiaaginnalissasoq. Taamatut isikkoqarnissaa ilimagineqarpoq arnat 25-t inorlugit ukiullit meeqqiornerat taamaaginnassappat, arnallu 25-t sinnerlugit ukiullit meeqqiornerat 5 procentimik qaffassappat. Tamanna titartagaq 4-imi aamma takuneqarsinnaavoq.
Ilimagineqarpoq arnat 1.000-it meeqqiornerat 2.132-nut qaffassasoq , tassa inunnik amerlisaataalaartumik meeqqiortoqassasoq, arnaq ataaseq 2,1-inik meerartaartassasoq.
Ukiuni tulliuttuni inunngortut amerlassusaannut arnat meeqqiorsinnaasut amerlassusaat sunniinerpaasussaavoq, innuttaasut amerlassusissaannik naatsorsuinermi ukiuni amerlasuuni siullerni arnat meeqqiorsinnaasut ikilisussaapput. 1990-ikkunni inuusimasut amerlapput (1960-ikkunni inunngornikorpassuit meeraat) taakkulu erninissatik tamakkingajalerpaat.
Titartakkami 5-imi takuneqarsinnaavoq 1990-ikkunni inunngortut akornanni niviarsiaqqat inunngortut 30 procentit angullugit maanna inunngortunit amerlanerusut. Niviarsiaqqat taakku siunissami meeqqiortuusussaapput.
Titartagaq 5. 1973-imiit 2017-imut niviarsiaqqat inuusut
Najoqqutaq: Naatsorsueqqissaartarfik - Kisitsisaataasivimmi kisitsisit takukkit (http://bank.stat.gl/benbbl0).